Forum Créole !


Re: film bollywood
De :
Email :
Pays :
Date : 21 Jun 2005


Fim "Bollywood". mwin pérsonèlman mi yinm pa. inn parské mi yinm pa fim an mizik.
osi kan mi wa bann fim na d-zafér an misouk dodan. lé pa ninportkisa i tourn dann fim-la, pa ninportékèl zindyin. mwin mi soutir pa sa.

alor mi poz la kèstyon, an Inn néna bann kas, dann fim bolliwood-la kisa i zwé dann fim, sak la po lé klér.(domoun va dir mi radot, mi di ninportkosa, mwin lé fou, ankor inn fwa) alor mwin mi rant pa dann zé-la po linstan, na tro-d zafér an misouk. si sé po mwin alé asèt bann fim-la po angrès lo sistinm kas an Inn. non lé bon mérsi.

aprésa i fé mal amwin ké n'in pé i koné minm kisa zot i lé? ousa zot i sort? mésoman tèl zot i wa in moun in pé konm zot, i sant dann télé la zot i san pi zot kor.

la zot lé pi malbar zot lé indyin la mod lé pli for k-zot lèspri. amwin pérsonèlman la pa la mod va désid po mwin kosa i fo mi ékout, kosa i fo mi manz. mwin lé sak mi lé.
isi osi néna la mizik malbar kisa i fé in kont ansanm. napwin gro larzan konm déyér Bolliwood, akoz sa li mars byin.

Bolliwood sé in lègzanp la sosyété zordi. asté, asté, i fo i pas dann télé ragoul domoun avèk ziska dégobiyé. i fo in nafér i pas an longér-d-zourné dann télé po awar inn valér. lo moun lé pa kapab désid par li minm????????

nou lé pli fité k-zanimo? ouswa i fo in moun po désidé? pars nou lé pa asé for po sa?

pars Bolliwood i ègzis pa dopi zordi. nana osi dot fim indyin mésoman sa i pas pa dann télé. napwin triyaz dan nout kafé. nou anval la kok la po la pay lo brans lo pyèdbwa tout ansanm, nou lé pa kab triyé.

mwin mi artrouv pa mwin lad-dan.

aprésa, la mizik i fo i avans, pars la mizik sé in sonbliyé po port soulaz domoun, po port nout vwa po amontré nou lé la.

sinonsa nou té ankor èk in sèl mizik, sab bann promyé moun navé si la tér-la.
nanpès i fo pa nou lé kouyon.

la toudinkou n'in pé i bat an aryér

antouka Bone fèt la mizik tout domoun. mi éspér la mizik va kontinyé port lo kér la vwa bann pèp.







www.creole.org