Forum Créole !


Danyèl Waro : Sowéto
De : Danyèl Waro
Email :
Pays : Larényon
Date : 9 Jun 2005


Sowéto

Na d'san i koul
Dann somin blak Sowéto
Atèr laba dann in péi
In ponyé fanm
Bononm, zanfan
Zot sévé lé krépi
Zot sévé la gingn koutkony
Akoz saminm i siny
Akoz saminm bann blan
La po pas pingn
La doulèr
po ras zot konsians
Po tié zot koulèr
Kafé griyé

In pèp i dobout i mars
I rèv
N' in pèp i koup dann santyé
Po défil si la plinn
I touf dann san kayé
Si zot koko lé konyé
I gingn pa mor
I krèv
Konm lo syin bordaz somin

Akoz le pingn la mayé
Akoz zot la kriyé
Zot pwin lévé
La pa fé dézord
Po désir linz blan
Lé si zot
Po fé pèt lo syèl
Po fé pèt le fyèl

Atèr laba granmoun
Panbalaba momon
Pabezwin ou la pèr zanfan
Rouvèr lo zyé, ogard
Mwin la tandi
In ponyé boug i tat dann fénwar
I rod in vyèrz lé noir
Zot i krwa pi kolonm lé blan
Zot i vé pi zwazo lo san
Rouvèr zot zorèy akout
Bouginvilyé ansanm do lo
Lé dan nout po
Maryo Biko arkri in kou
Mon kèr lé plin la bou
Lo gou do lé
Koulèr la pé
Maryo Biko mwin lé sou
La pa mon gro pléré lo ronm
Lé kab fé in bononm
Lé kab tyé in kolonm
Mi giny minm pa tir lo pi
Nana boubou nout péi
Maryo Biko Sowéto
Mi domann aou pardon
Pou nout bann frèr la Rénion.





www.creole.org