Forum Créole !


Donn la min, anon nou mèt ansanm èk Ankraké
De : Dyanpar
Email :
Pays : Larényon
Date : 12 May 2005



A N K R A K É
Pou Galiz In Shomin, Trouv In Domin


Zot i rapèl, la méri Sinpièr dopi avril 2001 i mèt doboi po tié nout lasosiasyon : la rod po fout anou déor, la koup tout sibvansion, la rod po fé pèr anou sanm ménas… Mé nou tienbo é sa sé akoz zot lantouraz. Nou la fini par alé dovan la zistis é lo 9 zanvié 2004 nou la gingn in promyé batay : tribinal la anïl lo désizion konsèy mïnisipal Sinpièr té otoriz vann lo lokal an misouk. Eksa nou té kroi nout té fine gingn in trankilité… Anpliskésa lo 29 désanm 2004, lo mér Sinpiér la propoz anou in laranzman : li té dakor donn anou in not lokal dann Sinpiér, li la parti ziska roul atèr po fé zéskiz.

Mé té san konté akèl poin makrotaz politik, lo mépri la liberté sanm la mésansté té pli for. Lo 10 mars 2005 zuisié la amèn son papié po di anou i fo nou kit lo lokal toutsuit : « Sommation Interpellative et sommation de quitter les lieux ». Lo soi dizan propriétèr (lo madam in gran kamarad lo mèr) i ral anou dovan tribinal. Dapré èl nou okip son bien. Eksa èl i domand anou pey 500 € par zour d’rotar, 12000 € akoz nou défann a èl rant dan son bien é osi ké nou pey son fré lavoka.

Konm zot i woi la méri la syé si la tèt la loi. In vant anilé i anpèsh pa in fanm fé konmsi èl lé propriétèr é ral domoun dovan la zistis.

Mé nou débouz pa, nout koko lé dir. Nou kontinié dress dovan. Nou vé défann zisko bout nout droi. Nou kontinié kroir ké la liberté maziné, la liberté kozé, la liberté fé, sa in vré droi domoun toulbon. Nou la désid pran in lavoka po défann lasosiasyon dovan tribinal. Po fé son travay li domann anou 2000 €.

Nou fine domand sakinn donn sat li pé é néna déza in pé la moné la fine rantré.IN GRAN MERSI DEZA Mé nou vé osi, ansanm zot koz si lo trikmardaz. /
Kosa in moun dann péi la Rényon si li pans pa konm lo pouvoir ?
Kosa in lasosiasyon isi La Rényon si li travay po mèt anlèr la réyonèzté ?
Kosa in lasosiasyon isi si li pran pa in kart dann in parti ?
Kosa i fo fé po fé arèt persikisyon, lo mépri, é pou viv in vré démokrasi…. Zordi Ankraké, yèr innot é domin néna ankor bèzman po pran. Nou invit azot dimans 22 mé dan la kour nout lokal po Kozé si tousala, po fé ésey fé avans lo droi.
10 z'er apartir SOBATKOZ
midi : nou partaz in ropa ansanm, pou sa zot i apèl bonèr ziska lo 21 lé bon pou rézervé, lo timoné va anserv pou lo solidarité
Nora fonnkézèr va donn la voi osi, (Danyèl Waro, Dédé Lansor, Marie-Lyne……..) lo baro lé rouvèr pou lo droi, la liberté kozé……
FANE LA NOUVEL PARTOU
Tél : LAURITA 0692/52/00/15 ERIC 0692/0194/64

Nou tyienbo dalon ek zot



www.creole.org