Forum Créole !


konprann n out listwar po konprann anou
De : Dyanpar
Email :
Pays : Larényon
Date : 26 Apr 2005


in moun i koné pa son listwar i giny arpa konprann sak nou di zordi. pars li sra dépasé. ouswa va di nou sé d'zintélèktyèl.

ma prann lègzanp lo maloya. akoz lo maloya té défandi. akoz té in mizik zèsklav. nora domoun po di mi déroz mi radot séfoutpa mon koko i blok. akoz in santér séga té i di maloya sa in mizik sovaz dann komansman té in mizik bann nwar. la nou wa lo gatir rant lo sovaz é lo nwar. va di mwin lé fou mwin lé sou. akoz la drwat la rod touf maloya? akoz kan zot la pa ginyé zot la rod rann ali valé pirz ali tout son koté zèsklav po rann ali in mizik folklor.

akoz domoun i wa myé lo séga ké lé maloya. lé parazar, po mwin? kan ou gard listwar ou wa byin akoz lo séga lé plis émé.

akoz lo yab té bordé minm ziska zordi, parazar non mi krwa pa

si rényoné i pran pa an kont son listwar an finfon é pa listwar la Frans i di anou èk dé ti mo parsi parla po bous nout zyé, nou wa sa ankor dan la lwa la voté po aprann marmay lékol lo bon koté la kolonizasyon. kisa la vot sa in parti i apèl l"UMP" parazar mi krwa pa non pli.

isi larényon ousa la délinkans té pli for, dann sité armont in pé plis bann sité té kwé avan? Bidonvil? Bidonvil té kwé avan? kan zèsklav? in azar ankor?

i fo nou fouy nou fouy lwin minm po konprann? mi rod pa zèskiz po sak i tyé i vol i vyol mé i fo konprann. dann in kozé si lo rasis dérnyé kou nou la nonm sa in maladi é i fo nou rod in tizann po fini èk li.

Akoz in moun "kaf" dann son san konm tout rényoné na lo san zèsklav la pér i moukat sérvis po zansèt kiswa sérvis kaf sérvis makwalé sérvis maligasé sérvis kabaré.

sak lé pli for la kolonizasyon sé la kolonizasyon dan lo kokodtèt.

nou wa sa ankor kan la Frans la débark sépa lafrik sépa Madégaskar la aprann marmay la marséyèz.
akoz zordi bann malgas i profér mèt anlér la lang fransé ké zot lang.

Akoz bann mo dan malgas dan la lang kréol i déranz sa i dat pa d-zordi akoz i vé nou ékri kréol manir fransé i dat pa d-zordi.
bann moun té vé pa ékri kréol dot manyèr ké lo fransé té bann rasis. la pa mwin i invant zot la ékri bann liv.

akoz inn ti lil kaniki larényon la zamé ral pérsone, ariv in lér la frans la sot dési. lé pa parazar.

ala mon kozé na tourné viré in pé.
mé mwin lé pa fou mwin lé èstrémis mi sa pa poz la bonm parsi parla. mi sèy konprann mon listwar dann tout son koté.




www.creole.org