Forum Créole !


Repons pou franswa
De : Kelval
Email :
Pays : Déors
Date : 10 Nov 2000


Koman y lé Franswa?

Out ti modékri lé blésan (pir siklon 48!), mé mi respek out fason d'vwar.
Mé dan out fason d'vwar néna bonpé prétansiyon mounwar.
"s'attache désespérément à des sottises"
A kél tite ou pé di in nafér kom sa?
Eskiz amwin, ou lé franswa ou françois?
Si ou lé franswa, lé tris pou ou , lé tris pou nou.

In dézièm zafér: "je vous comprend tout à fait"
Franswa ou François, lo zour ou va gainy kos kréol, ou manz déri rougay dan pilon é sirtou ou va réspek lidantité é la kiltir réniyoné, ou poura di:"mi kompran azot". Tank ou va di "Je vous comprend tout à fait" ou nora riyin kompri!
Péters noré di " ou lé in bon parabolér angrésé d'kontradiksiyon"

trwaziém zafér: kréol a lékol
Lobzektif sé pa konkirans lo fransé!
Lo fransé sé in lang forsé, mé mi rokoné indispansab zordi. Lo kréol, sé in lang lib ké nou vé ékri pou pa perd.
lobzektif sé "ékri ali, aprann' ali pou pa perd"

Si ou lé larényion, lo zour ou va war in gramoun dinsertinlaz kos ek son'ti garson, lo marmay y répond ali "Je ne comprends pas ce-que tu dis grand pére"
ou poura di "astér mi konpran azot"
Lo zour la ou va war k'la korde ti zouinn' dé zénération la kasé, ék'dofé té y bril dopi promiyé zesklave la poz lo piyé si nout péi larényion, la étinn'.
So zour la ou poura souf tanpikipé si la sand, soulév in ta la pousiyér, ou va alé dovan mé ou giny arpi war dériyér!

Sak kosé na son valér, sak kosé y véikil patrimwann' kiltirél in pép, si ou ékri pa li, ou va étinn' la bréz i résof kalité zanbrokal réniyoné nou lé.

Kelval


www.creole.org